(+670) 7712 7606 — info@thekraken.tl

SEKOMS hakarak koopera ho The Kraken Band dinamiza komunikasaun sosiál di’ak liután

Sekretáriu Estadu Komunikasaun Sosiál, Merício Juvinal dos Reis Akara, hamutuk ho ekipa tékniku SEKOMS, hasai foto bamutuk ho The Kraken Band hafoin enkontru iha Gabinete SEKOMS, iha Palásiu Governu, segunda (17/08). Imajen/SEKOMS

DILI, 17 agostu 2020 (TATOLI)-Sekretáriu Estadu Komunikasaun Sosiál, Merício Juvinal dos Reis Akara, halo audénsia ho banda múzika The Kraken Band, hodi haree posibilidade atu serbisu hamutuk iha área komunikasaun sosiál.

“Ha’u halo audénsia ho grupu The Kraken Band no ha’u foin hatene didi’ak sira iha kreatividade no vizaun di’ak. Entaun Sekretaria Estadu Komunikasaun Sosiál (SEKOMS) hanoin bele iha kolaborasaun ho sira atu dinamiza komunikasaun sosiál ho di’ak liután,” tenik Sekreáriu Estadu Akara ba Agência Tatoli, hafoin ramata enkontru ho banda múzika ne’e iha Palásiu Governu, segunda ne’e.

Tuir governante ne’e, SEKOMS hakarak fó sai mensajen ba públiku ho maneira diversifika meiu komunikasaun sosiál.

“Entaun ha’u hanoin ita kolabora ho grupu banda sira, atu mensajen Estadu no Governu liga ho dezenvolvimentu no edukasaun sívika bele fó sai liuhosi múzika. The Kraken kontente tebes ho inisiativa ne’e no SEKOMS sei haree programa balun atu kolabora ho sira,” nia akresenta.

Governante ne’e fó ezemplu, hanesan ba atividade programa “Naroman ba Suku” bele kolabora ho banda múzika ne’e hodi partisipa iha sesaun animasaun, ne’ebé sira bele fahe esperiénsia halo planu di’ak iha nível nasionál no munisípiu.

Nia mós informa ona ba The Kraken Band katak sei iha enkontru tuirmai atu kolabora dezenvolve publisidade no atendimentu públiku, kombate lia falsu liuhosi edukasaun sívika.

“Mensajen liuhosi kanál musika ne’e ha’u hanoin efetivu liu,” nia subliña.

Tanba ne’e, nia iha esperansa kooperasaun ho  banda musika nasionál ne’e sei akontese iha tempu badak.

“Ha’u dehan ona ba sira katak ha’u sei konvida Diretór sira iha ne’e atu halo enkontru ida tán, atu hahú deskute kona-ba operasionál, maibé ha’u hakarak dehan ba The Kraken katak SEKOMS iha interese atu kolabora ho grupu múzika sira hanesan ne’e,” nia realsa.

Iha fatin hanesan Kordenadór Jerál The Kranken Band, Natalino Fernandes Ximenes, apresia ho inisiativa SEKOMS no kontente SEKOMS hakarak kolabora hamutuk ho sira.

“Ami agradese tebes ba Governu, prinsipálmente SEKOMS, tanba ami hetan konvite espesiál husi Sekretáriu Estadu,” nia akresenta.

Nia konsidera hanesan pasu inísiu hodi fó koñesimentu jerál vizaun The kraken ba SEKOMS, atu haree saida maka banda múzika ne’e bele kontribui ba nasaun liuhosi kreatividade múzika liga ba komunikasaun sosiál.

“Antes ne’e ami iha ona múzika balun kona-ba konbate lixu, foin daudaun mós kona-ba kombate COVID-19 mós iha musika, seluk maka kona-ba problema sosiál hanesan respeita ema ho difisiénsia, viva feto Timór no kombate kaben sedu,” nia haktuir.

Liga ho área komunikasaun sosiál, parte SEKOMS husu The kraken halo múzika kona-ba kombate lia falsu, tanba ne’e sei iha tán enkontru ho SEKOMS atu haree modelu mensajen saida maka banda ne’e bele halo liuhosi múzika, nune’e públiku bele simu.

”Ami antuziasmu no kuriozu hakarak halo duni múzika ne’e tanba papél mídia iha pilár tolu atu informa, eduka no diverte. Tanba ne’e, The Kraken rasik iha parte eduka iha setór komunikasaun sosiál. Ami hakarak kontribui iha parte ida-ne’e,” Natalino Fernandes subliña.

Jornalista: Natalino Costa

Editora: Julia Chatarina

Fontes: www.tatoli.com

X